Mobile Water Treatment Facility, dugang kakuhaan og suplay sa tubig sa Butuan
January 18 2022, Tuesday 01:00 PM
Nakig-alayon ang Butuan City Water District kun BCWD sa buhatan sa Local Water Utilities Administration kun LWUA para sa ilang Mobile Water Treatment Facility nga himuong alternative water source alang sa mga residenteng wala pa naabtan gihapon og suplay sa tubig. Kini gawas sa gipahigayong mga water rationing sa BCWD sa nagkalain-laing barangay.
Sumala ni Engr. Al Patrick Dela Calzada, OIC-Production and Distribution Department, BCWD, ang Mobile Water Treatment Facility, gitawag nga complete treatment na siya tungod kompleto na kini sa sedimentation, filtering, ug chlorination aron ang mugawas nga tubig kay potable water o mainom na nga tubig.
Gipahimangnuan sa BCWD ang mga residente nga magkuha og tubig sa mobile treatment facility nga bisan pa kini potable water giawhag gihapon nila nga pabukalan ang tubig aron malikayan ang contamination nga anaa sa mga kaugalingong mga container.
Regular usab ang monitoring sa mga laboratory personnel sa maong water treatment facility ug pasado sab kini sa Philipiine National Standard for Drinking Water.
Nahimutang kini sa may diversion road sa Barangay Bonbon. Mamahimung makakuha ang mga residente og tubig sugod sa alas sais sa buntag hangtud alas otso sa gabii matag adlaw nga adunay maximum nga lima ka containers matag indibidwal o matag pamilya.
Mipahinumdum ang BCWD sa mga barangay nga duna nay suplay sa tubig nga magpundo og tubig aron may magamit sa adlaw-adlaw.
NEWS ARTICLES