Gisugdan na ang pagpahigayon sa public konsultasyon sa mga residente sa Barangay Tagabaca ning syudad sa Butuan kabahin sa ipatumang pagsemento sa dalan sa barangay. Mismong ang mga personahe sa City Engineers Office Planning and Programming Division ang nanguna sa kalihukan aron sa pagpasabot sa katawhan nga posibling maapektuhan sa proyekto. Gihingusgan sa lokal nga panggamhanan sa Butuan pinaagi ni Mayor Engr. Ronnie Vicente C. Lagnada ang pagsemento sa mga kadalanan sa kabarangayan asa gikuha ang pondo niini sa Supplemental Budget No. 7 sa LGU Butuan nga mukabat sa 400 milyon pesos. Ang mga barangay nga makabenipisyo nga pagsemento sa mga kadalanan mao ang Barangay Tagabaca, Mahay, Aupagan, Mandamo, Sumile, Maibu, Bilay, Pigdaulan, Camayahan ug Basag. Gikalipay sa mga residente ug opisyales sa barangay ang maayong balita ug andam kining muhatag sa ilang kooperasyon tungod dugay na kining gipangandoy nga kalambuan sa ilang barangay.