Gipasalig sa Butuan City Water District kun BCWD nga mahatdan og tubig ang mga barangay nga wala pa gihapoy agas sa tubig hangtud karon. Kini aron matubag ang kinahanglanong kunsomo sa tubig sa mga residente. “Ang atong rationing sa tubig, naka schedule na siya sa mga areas nga gitan-aw nato nga way agas og tubig o hinay kaayo nga muawas lang sa gabie. Naa tay call center diri 24 hours,”pahayag ni Engr. Anselmo Sangtian, General Manager sa BCWD. Pahayag ni BCWD General Manager Engr. Anselmo Sangtian nga ang upat ka pumping station sa may Barangay Baan ug Taguibo igo ra sab maka suplay sa equivalent sa 15% sa total production capacity sa TASC. Bisan giguba sa bagyong Odette ang catchment area sa dam o punduhanan sa tubig, hinay-hinay nga nakasuplay og tubig ang TASC padulong sa BCWD sa tabang na sab sa mga pumping stations. Sa karon anaa sa 24million liters a day ang mahatag sa TASC samtang 10.8 million liters a day ang mahatag sa BCWD nga suplay sa tubig. Sa kinatibuk an anaa sa 34.8million liters per day sa tubig ang galihok sa pagkakaron sa dakbayan sa Butuan. Gipangayo sa BCWD ang igong pagsabot sa mga apektadong konsumante sa tubig kay gihimo ang tanan nga daling maayo ang naguba nga pasilidad sa TASC aron mabalik ang normal nga suplay sa tubig. Mamahimung motawag sa hotline numbers 09189304234 / 09171888726 o kaha tawag sa landline 3423145/3423146 alang sa iskedyul sa water rationing.