Daghan na sa mga nanag-iya og mga patigayon ang naka apply ug naka renew og business permit sa gipahigayong Business One Stop Shop kon BOSS sa Robinson’s Place Butuan, kini sa pagpanguna sa Business Permit and Licenses Division kon BPLD. Dako ang pasalamat sa mga nanag-iya og patigayon sa syudad tungod gihimung konbinyente ang ilang pagkuha sa business permit. Gawas nga lapad ug daku ang lugar, hapsay sab ang gipatumang proseso. Daghan na sab sa mga nanag-iya og patigayon ang nipahimulos sa SP Ordinance Number 6412-2021 o ang tax exemption/tax relief nga gi-aprubahan sa Lokal nga Panggamhanan sa pagpanguna ni Mayor Ronnie Vicente Lagnada. Usa si Edwin Fortaleza, nga taga Barangay Holy Redeemer ug adunay Sari-sari Store ang nakapahimulos sa tax exemption. Alang niya migamay ang iyang nabayaran karon nga tuig ug mas ni hapsay ang nahitabo nga proseso sa iyang pagkuha sa iyang Business Permit. Mahuman ang Business One Stop Shop kon BOSS karong Pebrero 28, 2022.