Nakaharvest na sa iyang tanum nga Cauliflower sulod sa Green House Facility si Agriboost Champion Jovanie Samosino sa Barangay Anticala ning syudad sa Butuan. Dinhi nasuta ni Samosino ang maayong kalidad ug dagko ang iyang harvest sulod sa pasilidad kumpara sa tanum nga wala sa pasilidad tungod atakihon kini sa mga insekto. “Hayahay gyod ang tanum nga anaa sulod sa Green House Facility kay wala nakay hasol kaayo kay di naka mag patubig isa-isa sa kada punuan. Advantage gyod kaayo ang naa sa sulod maayo gyod ang resulta. “Sumala ni Agriboost Champion Jovanie Samosino. Gipaabot ni Samosino ang dakung pasalamat kang Mayor Ronnie Vicente Lagnada nga usa ang mga mag-uuma sa Barangay Anticala nga nakabenipisyo sa Agriboost Project asa nahatagan og greenhouse facilities, vegetable seeds, fertilizers ug uban pang materyales sa pagtanum pinaagi sa City Agriculture and Veterinary Department. Gipanghinaut usab niini nga mapadayon na ang pagsemento sa dalan sa barangay aron mas hayahay na ang byahe sa mga abot padulong sa agrihub facility. Mapalit ang mga abot sa nga mag-uumang champion sa agriboost project sa nagkadaiyang Veggie Fresh sa kabarangayan ug Agrimart Flagship Store sa Van Terminal Langihan area.