Malampusong napahigayon ang Audit Closing Meeting alang sa Risk-Based Internal Audit Engagements sa tulo ka mga departamento sa City Government sa Butuan. Kini gilangkuban sa Butuan Medical Center (BMC), City Health Department (CHD), ug City Accounting Department (CAD), October 29, sa SP Session Hall. Ang nasangpit nga Audit Closing Meeting gipangunahan ni Mayor Ronnie Vicente Lagnada ug Vice Mayor Lawrence Lemuel Fortun. Gihisgutan sa meeting ang mga obserbasyon sa City Internal Audit Services Department (CIASD) nga gipangulohan ni March Belle Lor, CPA, isip tigdumala sa departamento. Ang mga Internal Auditors misusi sa aspeto sa management, risgo, mga proseso, ug mga mando sulod sa mga departamento ug naghimo sila og mga rekomendasyon aron matubag ang maong mga obserbasyon. Ang Internal Audit importante aron mahibaw-an ang mga kakulangon ug angayan nga palamboon sa sistema ug mga proseso sa nasangpit nga mga opisina. Lakip usab sa meeting ang mga input gikan sa mga miyembro sa City Audit Committee nga mihatag og pag-aproba sa mga lakang nga buhaton sa mga departamento aron masulbad ang mga obserbasyon. Mikomitar usab ang mga Department Heads sa pagpatuman sa mga solusyon niini. Sumala sa kinatibuk-ang resulta sa audit, daghan pang kinahanglan nga aksyon ug mga pagbag-o sa mga pamaagi sa operasyon ug sistema aron mas mapaayo ug mas mapaspas ang serbisyo alang sa katawhan. Tungod niini, nagkinahanglan pa kini og igo nga panahon aron masiguro nga kini ma-align sa plano sa atong Mayor alang sa Dakbayan sa Butuan. Gihingusgan ni Mayor Lagnada ug Vice Mayor Fortun ang importansya nga dali nga maatubang ang mga risgo sulod sa mga buhatan aron mahimong hapsay ug epektibo ang serbisyo sa panggobyerno, labi na sa kahimsog sa katawhan. Ang City Audit Committee gipangulohan ni Mayor Ronnie Vicente Lagnada isip Chairperson, uban si City Vice Mayor Lawrence Lemuel Fortun isip Vice Chairperson. Ang mga miyembro gilangkuban nila Konsehal Joseph Omar Andaya, Cromwell Nortega, Cherry May Busa, Ehrnest John Sanchez ug Eduardo Gonzales, isip provisional member sa komitiba, nga pangulo sa Committee on Health and Sanitation.