"Daku sab kaayo ko og pasalamat sa mga sponsor niini, labi na sa taga PSA, sa taga Cityhall. Sa ka tiguwang nako, hapit na mo senior karon pa nadawat akong PSA. Karon pa ko na rehistro, maong daghan kaayong salamat." Mapasalamaton si Emelda Cullentas, 58 anyos nga taga Barangay Mandamo ning syudad human nakuha na niya ang iyang PSA copy sa birth certificate. Usa lang si Cullentas sa 98 ka benepisyaryo nga nakakuha sa PSA copy sa Birth certificate atol sa Culmination Program sa 34th Civil Registration Month sa City Hall Lobby, City Hall Bldg., ning syudad kagahapon. Admitado si Cullentas nga tungod sa walay kumpletong impormasyon sa iyang birth certificate wala siya nakuhaan sa iyang ginikanan. Apil sab gikuhaan ni Cullentas ang iyang usa ka anak, kay sa walo niya ka anak mao nalang kini ang wala pay birth certificate. Sa mensahe nga gipaabot ni Mayor Ronnie Vicente Lagnada pinaagi kang Social Welfare Committee Chairperson City Councilor Victor Vicente Plaza ang pagbaton sa birth certificate usa ka rekisitos sa pagkuha og National ID ingon man magamit sab sa mga transaksyon labi na sa mga programa sa gobyerno. "Because we want to empower our citizens with legal documentation it is our goal to help all Butuanons equip with a necessary legal documentation to claim their identity and civil status and ensure their rights as citizens of the Philippines. Let this ceremony be a reminder of our commitment to building a society where every individual is recognize, respected and afforded the opportunities they deserve. Importante nga kahibaw kita sa atong mga katungod ug mga serbisyo nga angay ka nato" tipik sa mensahe ni Mayor Ronnie Vicente Lagnada pinaagi ni Konsehal Victor Plaza. Tumong sa proyekto nga bisitahon ang mga lagyong barangay sa syudad aron mapadoul ug mapasayon na sa mga residente ang pagkuha og birth certificate nga usa ka rekisitos sa pagkuha sa National ID. Ang aktibidad ilawom sa Philsys Birth Registration Assistance Project kun PBRAP nga gipangunahan sa Philippine Statistic Authority kauban ang City Civil Registry Department ug mga Barangay sa syudad.