Miabot sa 568 ka total transactions ang nahitala sa Commission on Election-Butuan human sa unang semana sa voter registration nga nag sugod niadtong Pebrero 12. Sa 568 nga total transactions, 187 niini ang new registration ug ang 381 niini ang correction ug change address. Gibutyag ni City Election Officer Atty. Tristan Niog ang ilang plano sa pagpahigayon og Satellite Registration ug Registered Anywhere Program kun RAP. Ang Satellite Registration ipahigayon sa mga clustered barangay para mas mapasayon sa mga residente sa syudad sa Butuan ang pag pa rehistro. Samtang ang RAP usa ka bag-o nga aktibidad nga ipahigayon sa dagkong mall sa syudad para ma cater ang kliyente nga dili taga Butuan nga gusto mag pa rehistro nga dili na kinahanglan pa mouli sa ilang yutang natawhan para lang ma rehistro. Gi-awhag ni City Election Officer Atty. Tristan Niog ang katawhan sa syudad sa Butuan sa pagbisita na sa buhatan sa Comelec sa wala pay deadline. "Ato gyud kining gipanawagan sa atong mga ka igsoonan nga sayo mag pa rehistro. Nakasayod man kita nga ang pag parehistro requirement ni siya aron maka excercise sa imong katungod sa pag botar. Sa pagkakaron no, kung walay kausaban aduna kitay duha ka election sa 2025 midterm election sa Mayo diin mag pili kita sa mga lokal nga opisyales sa atong syudad uban man sa atong Senador, ug sa Disyembre aduna sab gitakda nga Barangay ug SK Election. Aduna kitay taas nga higayon sa pag rehistro, gikan sa February 12 hangtud sa September 30. Gi-klaro sab ni Atty. Niog nga dili pa pwede mopa rehistro ang wala pa nag deysi otso anyos ug mag huwat lang sa special voter registration alang kanila.