Migradwar na sa Community-Based Drug Rehabilitation Program kin CBDRP ang 54 nga Person Who Used Drugs kun PWUDs nga gipahigayon sa City Hall Lobby kaganinang buntag. Dose ka semana silang gipailawom sa rehabilitation program diin tabangan silang makahaw-as sa pagkasugamak sa gidiling druga ug aron makabaton sa maayong kugmaon. Usa ang traintay uno anyos nga si Alyas Gino ang nakakumpleto sa rehabilitation program sa lokal nga panggamhanan sa Butuan sa pagpanguna sa City Anti- Drug Abuse Council, PDEA, PNP, DOH, City Health Office ug mga opisyales sa barangay. Alang niya, daku ang kabag uhan dihang niundang siya sa pag gamit sa gidiling druga. “Daku akong pasalamat sa CADAC nga naa ni nga programa tungod makatabang sa amung tanan,” sumala ni Alyas Gino, usa ka PWUD. Gitimbaya sab ni City Councilor Victor Plaza ang mga PWUDS nga mi-atubang sa hagit sa pag undang sa paggamit sa iligal nga druga. Gibutyag sab ni Liga President Gemma Tabada nga nahimung inspirasyon ang mga PWUDS labina sa mga indibidwal nga wala pa misurender sa sabakan sa balaud. Ang mga PWUDs usa sa prayoridad nga hatagan og panginabuhian ingonman prayoridad sa mga pagbansay ilawom sa mga programa sa panggamhanan ug uban pang ahensya aron magamit niining makakita og trabaho. Nanghinaut ang lokal nga panggamhanan nga mamahimung matinud anon ang mga migradwar nga mga PWUDS ug likayan na ang pagbalik sa bisyo aron magpuyo nga malinawon uban ang pamilya ingonman makabaton sa maayong kaugmaon.