Migradwar na ang 500 ka mag-uuma sa dakbayan sa Butuan sa School on the Air Vegetable Production ug School on the Air Smart Rice Agriculture human kini mituon sa mga teknolohiya sa panguma. Kini pinaagi sa pagpaminaw sa programa sa radyo sulod sa 16 ka semana asa usa sa speaker niini si Engr. John Wevin Tingas sa City Agriculture and Veterinary Department. Gitahasan ni Mayor Ronnie Vicente Lagnada si City Councilor Cromwell Nortega nga musalmot sa natigayong Graduation Ceremony sa Balanghai Hotel and Convention ning syudad, Oktubre 22. Sa gipaabot nga mensahe ni Mayor Lagnada alang sa mga mag-uuma, gibutyag niini nga ang programang School on the Air dakung tabang sa mga mag-uuma aron ma-adopt niini ang bag-ong teknolohiya sa ingon maoy mamahimong tinubdan nga mabag-o ang kahimtang sa mga kaigsoonang mag-uuma. Suportado ni Mayor Lagnada ang nagkalain-laing programa ug proyekto sa mga mag-uuma sa dakbayan sa Butuan pinaagi sa City Agriculture and Veterinary Department kun CAVD sa lokal nga panggamhanan sa Butuan. Sa kinatibuk-an, libuan kapin ka mag-uuma gikan sa Caraga region ang migradwar sa programa pinaagi sa lig-on nga partnership sa LGU Butuan, Department of Agriculture Caraga, ATI Caraga Region XIII ug DA-Philippine Rice Research Institute.