Pormal nang giturn-over ang upat ka unit nga Hand Tractor Multi-Cultivator ngadto sa Butuan City Fruits and Vegetable Federation Inc. Gidawat kini ni Mario Nemenio, Federation President isip suporta sa mga mag-uuma sa pagpadako sa vegetable production sa Butuan City subay sa Agriboost Project. “Gihatag sa mga farmers ang multi-cultivator aron matabangan sila sa panguma para mapadali ang ilang pag landprep isa pod ni nga makapagamay sa ilang labor cost,” sumala ni DA-Agriculturist Vincent Paul Ngilangil. Prayoridad sa City Government sa Butuan pinaagi ni Mayor Ronnie Vicente Lagnada nga girepresentahan ni City Councilor Arturo Gado, Committee Chairman sa Agriculture, Fisheries ug Agro-forestry uban sa City Agriculture Office, Department of Agriculture Caraga pinaagi ni DA RO-13 Dir. Ricardo Oňate Jr. ug Christopher Lindo, RAFC Chairman. Kini aron matabangan ang mga mag-uuma ug mapagaan ang ilang trabaho pinaagi sa modernong teknolohiya uban sa panghinaut nga ampingan kini aron molahutay ug magamit usab sa ubang mag-uuma. Daku ang pasalamat sa usa ka mag-uuma gikan sa Barangay Tungao nga si Samuel Calawigan, Chairman sa Km7 Farmers Producer Cooperative nga nahatagan sila sa nasangpit nga ekipo tungod mas mogamay ang oras sa pag andam sa tamnan nga area. “Daku gyod kini nga tabang sa amoa labina ang nagkadaiyang cluster nga nagtanum og gulay sa among area. Matabangan niini sa pagprepare sa ilang mga area mahatagan sab kami sa kahigayunan nga mulambu ang pamaagi diha sap ag-ugmad sa uma.” ang pamahayag ni Samuel Calawigan Samtang, nagpinirmahay usab sa Memorandum of Agreement tali na sa city government sa Butuan, DA, RAFC ug ang recipient isip kasabutan nga ang recipient na ang magdumala sa maong ekipo apil na niini ang pag-amping ug maintenance. Sumala sa DA ug City Agriculture Office napili ang Butuan City Fruits and Vegetable Federation Inc. nga recipient sa mga ekipo tungod usa kini sa grupo nga aktibo ug dunay maayong kadumalahan sa ilang mga miyembro.