Migradwar na ang 35 nga Butuanong Vegetable Farmers sa Agriboost 2023 Farmers Field School on Vegetable Production human kini gipailawom sa mga pagbansay sulod sa lima ka bulan nga nagsugod niadtong Mayo sa pagpanguna sa City Agriculture Office aron motuon sa bag-ong methodology ug pagdumala sa pagtanum og gulay. Miyerkules sa buntag gipahigayon ang 2023 Farmer Field School on Vegetable Production Graduation Ceremony asa usa-usang midawat ang mga graduates sa Certificate of Completion nga gitunol mismo nila City Councilor Arturo Gado, TESDA Provincial Director Carlito Quintano, OIC Center Director ATI-RTC 13 Dr. Jessie Beldia, Lyn Parinas sa DA-Caraga Chief Agribusiness and Marketing Assistance Division, Kristina Cassion sa CTIIPO ug City Agriculturist Engr. Pierre Anthony Joven. Subay sa seremonya gipresentar nila Gretel Paracuelles, Farm School In-charge ug Prosperidad Abonete Agribloom Development Officer ang 23 ka FFS graduates nga mipasar ug nakalampos sa prescribed requirements ilawom sa Training for Work Scholarship Program kun TWSP sa TESDA sa Produce Organic Vegetable Production Leading to Organic Agriculture NC II. Tungod niini, pormal kining gideklara ug gikompirma nila TESDA Provincial Director Quintano ug City Agriculturist Joven nga nakakompleto sa basic requirements ug entitled nang makakuha na sa training certificate nga magamit abroad. Sumala ni City Agriculturist Joven ang mga vegetable farmers mao ang haligi sa pagkab-ot sa food security nga nagsunod sa market driven nga pamaagi sa farming pinaagi sa data driven, demand driven, decision making ug dunay sustainable nga production. Hinungdan mao kini ang gitutukan sa Agriboost FFS training nagsilbing usa ka platform sa paghatag gahum sa komunidad ug mga mag-uuma aron mapromote ang local innovatives alang sa malungtarong agriculture. Gidayeg ug gipasalamatan ni Mayor Ronnie Vicente Lagnada pinaagi sa City Agriculture Office ang tanang development champion ug partners nga nanguna sa paghatag og suporta sa agriboost project sama sa academe nga naglangkub sa Caraga State University ug FSUU, regional line agencies ug ang nagkadaiyang buhatan sa lokal nga panggamhanan sa Butuan.