Nagmalampuson ang natigayong 3rd Quarter Meeting sa Butuan City Statistics Committee sa pagpanguna ni Engr. Iris Joy Canete Galaura sa City Planning Development Office nga nagrepresentar kang Mayor Ronnie Vicente Lagnada isip Chairperson sa Butuan City Statistics Committee. Gihingusgan ni Mayor Lagnada nga makuha ang saktong datus ug statistics tungod mao kini ang basehan ug direksyon sa ipatumang mga programa alang sa local development hinungdan gimugna niini ang Butuan City Statistics Committee. Atol sa meeting, gipresentar sa Philippine Statistics Authority Agusan del norte kun PSA-ADN ang census enumeration ug updates sa 2022 census sa agriculture ug fisheries nga gilaumang mahuman karong bulana ug ang updates sa 2024 Community-Based Monitoring System asa ang makolektang data isumite sa City Planning Development Office alang sa ipatumang mga programa. Naghatag sab og updates ang Committee sa mga aktibidades sa umaabot nga selebrasyon sa 34th National Statistics Month sunod bulan. Ang BCSC gilangkuban sa mga buhatan sa city government sa Butuan ug lain-laing ahensya, academe ug stakeholders subay sa Executive Order no. 016 series sa tuig 2023. Kini aron dunay komitiba nga manguna sa pagmonitor sa statistical issues sa local level ug kini usab ang magsilbing venue sa mapahigayong diskusyon ug pagpasar og resolusyon base sa matigum nga datus.