Nagpadayon karon ang mga pagbansay sa Butuan City Manpower Training Center kon BCMTC mahitungod na sa Training Induction Program kon TIP sa Batch 2 sa mga benepisyaryo sa Shielded Metal Arc Welding NC I. Ang kalihukan nahimong posible pinaagi sa pagpanguna sa Technical Education and Skills Development Authority kon TESDA-Agusan Del Norte ilawom sa programang Special Training for Employment Program kon STEP. Ang mga benepisyaryo gikan sa Barangay Doongan, Ambago, Taligaman, Antongalon, Baan Km.3, Taguibo, Sumilihon, Los Angeles, Pangabugan, Bit-os, Babag, Baan Riverside, Tiniwisan ug Don Francisco. Ipailawom sa 37 ka adlaw nga pagbansay ug klase ang mga benepisyaryo. Nag sugod sila miaging Disyembre 29, 2023 ug mahuman karong Pebrero 21, 2024. Ang nasangpit nga pagbansay subay sa mandato ni Butuan City Mayor Ronnie Vicente Lagnada nga maghatag og igong mga programa ang buhatan sa BCMTC nga makatabang sa pagpauswag sa pangibuhian sa mga benepisyaryo niini.