Nagmalampuson ang natigayong Balangay Football Festival 2023 nga gipahigayon sa Polysports sa Barangay Tiniwisan ning syudad sa Sabado ug Dominggo. Miabot sa 235 Football Team gikan sa nagkalain-laing dapit sa rehiyon Caraga ug Mindanao aron mosalmot sa Balangay Football Festival nga gipangunahan ni Vice Mayor Lawrence Fortun isip BANFA President. Mapasalamaton si Vice Mayor Fortun sa tanang atleta nga misalmot sa kompetisyon bisan paman sa kainit sa panahon. Gipanghinaut sa opisyal nga na enjoy sa mga atleta ang pagdula lakip sab ang pakighigala sa ubang football players. “We are very happy that the number of teams that are participating have almost doubled. Abi ninyo, every year since we started 14 years ago..ang pinakataas nga naabot sa participating teams sa atong festival is 160. This year 235 ang atong participating teams from different parts of Mindanao. Ang ako hangyo sa atong mga coaches ug mga trainors, this is a festival, this is a celebration of joy. Every minute sa atong pagduwa let us play fair,” sumala ni Vice Mayor Lawrence Fortun, BANFA President. Wala nakapugong ang kainit sa panahon sa kompetisyon gani apil niini si Vice Mayor Fortun nga midula sa 45 Up ug BANFA-B sa unang adlaw sa kompetisyon. “We are here to teach our children, our teammates, the values of sportsmanship, camaraderie and determination. Kay kini tanan nga mga values that we learned from football are very applicable sa atong kinabuhi,” dugang tipik sa mensahe ni Vice Mayor Lawrence Fortun. Ang half Sri Lankan ug half Filipino nga residente sa Butuan City ug nagtungha sa FSUU nga si Rhyz Thajudeen sa U15 Boys Cuartel First Touch gipili niini ang sports nga football tungod mao kini ang nakahatag og kadasig ug lingaw kaniya. Nagpasalamat sab kini sa teammates sa suporta nila matag usa. “Because it’s very challenging and the process is very easy and fun and this event is a new experience for me,” pahayag ni Rhyz Thajudeen. Sa ikaduha nga adlaw sa kompetisyon mas grabe ang kainit sa panahon hinungdan nga naundang kadali ang dula tungod gihatagan sa higayon ang Butuan CDRRMO Fire and Rescue nga makapaulan og tubig sa football field aron dili maapektuhan sa kainit ang mga atleta. Apan wala makapugong ang kainit sa adlaw sa natigayong kumpetisyon. Mikampeon ang Under 8 Mixed, Under 10 mixed, Under 13 mixed, under 15 Boys, under 15 girls, under 18 boys, under 18 girls, under 21 boys sa Lianga FC, under 21 girls sa Higala FC, Mens Open sa Diamond FC, Womens Open sa Higala FC, 35 Up sa DFC C ug 45 Up sa Orlando FC. Girepresentahan ni Coach Gigi Napana ang paghatag sa trophy ug medals sa mga atleta sa natigayong Closing Ceremonies. Aron sab masiguro ang seguridad sa mga atleta, ginikanan, coaches ug trainors naka standby sa palibot sa football field ang mga personahe sa Butuan City Police Station BCPO. Ang Balangay Football Festival gisuportahan sa lokal nga panggamhanan sa Butuan sa pagpanguna ni Mayor Ronnie Vicente Lagnada.