Pormal nang gisugdan ang Caraga Regional Athletic Games 2025 kagahapon sa Nasipit Central Elementary School sa Nasipit, Agusan del Norte. Adunay dose ka delegasyon nga misalmot sa CRAG nga magtigi sa nagkadaiyang isports. Gilangkuban sa libuan ka mga atleta ug coaches ang dose ka delegasyon nga gikan sa Agusan del Sur, Bayugan City, Bislig City, Butuan City, Cabadbaran City, Dinagat Province, Siargao Island, Surigao City, Surigao del Norte, Surigao del Sur, Tandag City ug host delegation ang Agusan del Norte. “Mga kabataan ang inyong paglalakbay ay nagsisimula pa lang. Maaaring mahirap ang daan patungo sa tagumpay. Ang ginto ay hindi lang basta hinuhukay, pinapantay ito ng tiyaga at dedikasyon,” sumala ni Director Lucio Jesus Abalos, Director IV, DepEd. Human sa natigayong parada, iya-iya og pakitang gilas ang mga delegasyon sa ilang gi-andam nga saludo. Gipahinumduman sab sa first-ever Filipino Olympic gold medalist Hidilyn Diaz – Naranjo nga walay instant sa isports. Tanan gipaningkamutan ug kinahanglang magbaton og disiplina. Gawas kang Naranjo, anaa sab ang duha ka miyembro sa Alas Pilipinas nga sila Eya Laure ug Fifi Sharma nga nahimung inspirasyon sa kabataan. Gidasig nila ang mga atleta nga mahimung disiplinado ug determinado ug ipakita ang best sa gipiling sports aron nga maabot ang pangandoy. Molungtad ang CRAG hangtud Abril 4, adlawng Biyernes.