Nakabenepisyo sa libreng chest x-ray ang 173 ka mga residente sa Barangay Sto.Nino ning syudad sa natigayong TB Caravan miaging semana sa ilang barangay sa pagpanguna sa Ampayon Health District Zone. Ang TB-Caravan naghanyag og libreng Chest X-ray, Medical Consultation, lakip na ang laboratory test sa mga residente. Gawas sa libreng X-ray gihatagan sab og adbokasiya kalabot na sa epekto sa pagpanigarilyo ug Tuberculosis ang mga residente. Daku ang epekto sa nasangpit nga aktibidad sa mga indibidwal aron makita ang ilang status kalabot na sa sakit nga Tuberculosis. Mapasalamaton ang mga taga Barangay Santo Niño sa pagpanguna sa konseho nga sila nabisitahan ug nahatud ang libreng serbisyo. Pinaagi niini dali nalang makita kung positibo ba sa sakit nga TB ang indibidwal aron daling matambalan pinaagi sa program sa City Health Office kon CHO. Ang kalihokan nagmalampuson tungod sa pagtinabangay sa Philippine Business for Social Progress pinaagi sa Department of Health ug sa hingpit nga koordinasyon sa Maranao People Development Center Incorporated ug sa Butuan City Health Office ning syudad. Dekalidad nga serbisyong medikal para sa tanan ang tinguha ni Butuan City Mayor Ronnie Vicente Lagnada ug mapasalamaton siya sa mga ahensya nga mipaabot og tabang aron makuha ang bisyon sa syudad para sa tanang residente niini.