Natagan og Indemnity Check ang mga mag-uuma ug livestock raiser sa dakbayan sa Butuan miaging semana sa City Agriculture and Veterinary Department sa lokal nga panggamhanan sa Butuan. Ang paghatag sa indemnity check usa ka suporta sa agriculture sektor human giatake sa insekto ug naigo sa kalamidad ang mga tanum ug naigo sa sakit nga mga binuhing hayop. Sumala sa Rice Farmer sa Barangay Basag nga si Serafin Dacula paigo na aron ipamalit og pesticides ang nadawat nga 6,000 pesos para molahutay ang iyang tanum karon nga cropping season. “Makapalit na og medisina para sa insekto. Daku kaayo akong pasalamat nga usa kos nakadawat og kantidad nga 6000 pesos. Daku na kining tabang sa akong pang-uma tungod problema gyod namong mga mag-uuma ang mga insekto nga muataki labi na og gabie gumikan sa sunod-sunod nga pagbundak sa ulan," sumala ni Rice Farmer Serafin Dacula. Nahimong posible ang programa pinaagi sa pagtinabangay sa lokal nga panggamhanan sa Butuan pinaagi sa City Agriculture and Veterinary Department ug Department of Agriculture Caraga-Philippine Crop Insurance Corporation kun PCIC aron padayong masuportahan ang sektor sa agrikultura sa dakbayan sa Butuan.