Nahatagan sa Centenarian Certificate Award ug Cash Incentive ang usa ka 100 years old nga lola nga taga Barangay Libertad ning syudad miaging semana. Gidawat ni Lola Severa Cahoy ang certificate gikan sa lokal nga panggamhanan sa Butuan ug Department of Social Welfare and Development. Duna sab tseke nga nagkantidad og 100,000 pesos gikan sa DSWD ug 50,000 pesos gikan sa lokal nga panggamhanan. Ang pasidungog subay sa SP Ordinance No. 4757-2015 o An Ordinance Establishing the Centenarian Award to Qualified Citizens in the City of Butuan and Providing Benefits and Funds Thereof ug sa Republic Act 10868 o Centenarian Act of 2016. Sumala pa sa pamilya ni Lola Severa nga gulay ug isda gayud ang iyang paborito nga ginakaon. Mapasalamaton sab sila sa Ginoo sa taas nga kinabuhi nga gihatag kay Lola Severa. Dugang pa sa pamilya nga gisiguro karon sa mga anak ni Lola Severa nga siya mabantayan ug mahatagan sa iyang mga panginahanglanon. Plano sa pamilya nga ibutang sa account sa banko ni Lola Severa ang kwarta nga nadawat aron adunay makuhaan sa iyang panginahanglanon o sa oras sa emerhensiya. Taas ang respeto ni Butuan City Mayor Ronnie Vicente Lagnada sa mga katigulangan sa syudad tungod usa sila ka ehemplo sa nation building sa nasud.