Aktibong misalmot ang mga estudyante ug mga magtutudlo sa Libertad Central Elementary School sa gipahigayong National Simultaneous Earthquake Drill kun NSED, miaging semana. Pagtingog sa siren, dayong nag “duck, cover, and hold” ang mga estudyante lakip na ang mga magtutudlo isip kabahin sa safety measures kun ugaling dunay linog nga masinati. Gihingusgan atol sa drill ang importansya sa kaandam sa matag usa kung dunay mahitabong linog. Malampuson nga gipahigayon sa nasangpit nga tunghaan ang NSED nga nahimo kining Local Ceremonial Site sa syudad. Human sa drill, usa ka ebalwasyon ang gihimu aron makita ang kakulangon lakip nga mahatagan og acknowledgement ang insakto nga gibuhat sa 1st Quarter nga NSED. Gidayeg sa mga evaluators ang aktibong partisipasyon sa mga estudyante ug magtutudlo ug ang lugar nga gigamit para sa insaktong evacuation area. Duna sab mga rekomendasyon aron mapalambo pa ug mapalig-on ang disaster control group, building emergency evacuation plan ug paghatag og insaktong role o papel sa mga ginikinan nga anaa sa tunghaan. Ang aktibidad gipangunahan sa City Disaster Risk Reduction and Management Department kun CDRRMD, Regional Community Defense Group sa Philippine Army, ug Designated Control Group sa lokal nga panggamhanan sa Butuan.