Gikalipay ug gipasigarbo sa Madrig Martial Arts diri sa Butuan human nakuha sa mga taga team Madrig ang medalya sa bag-ohay lang natapos nga 2023 MVP/Smart National Online New Face of the Year Taekwondo Championship nga gipangunahan sa Philippine Taekwondo Association, Enero 29. Dunay duha ka kategorya ang nasangpit nga kompetisyon nga gilangkuban sa Kyorugi- Speedkicking ug Poomsae Individual. Nakuha sa mga bata sa Kyorugi-Speedkicking ang usa ka gold, tulo ka silver, ug pito ka bronze medal samtang sa poomsae individual upat ka gold, usa ka silver ug pito ka bronze. Ang kompetisyon gipaagi sa online ug gisugdan panahon sa pandemya para padayon nga mapakita sa mga kabataan ang ilang skills sa taekwando. Ug padayon gihapon kining ginabuhat para paghatag og higayon sa mga bata nga dili makalarga tungod sa kakulangon sa pinansyal nga aspeto. Daku ang kalipay sa mga bata lakip na ang ilang instructors sa Madrig Martial Arts tungod sa nakab-ot nga milestone sa mga bata ug nadungagan ang ilang experience sa mga kompetisyon bisan paman nga online kini. Mapasigarbuhon sab ang lokal nga panggamhanan sa Butuan sa pagpanguna ni Mayor Ronnie Vicente Lagnada sa kalampusan nga nakab ot sa mga taga Team Madrig.