Giaprobahan na ni Mayor Ronnie Vicente Lagnada ang City Ordinance no. 6778-2022 o ang ordinance prescribing guidelines sa rescue, assessment, recovery, reintegration ug aftercare program alang sa mga kababayen-an ug kabataang biktima sa pagpangabuso. Ang ordinansa mas naila nga Women and Children Protection Guidelines sa 2022 nga gipangamahanan ni City Councilor Cherry May Busa uban sa hugot nga suporta sa mga kauban sa konseho sa pagdumala ni Vice Mayor Lawrence Fortun. Kini subay sa section 40 RA 9262 nga naila usab nga Anti Violence Against Women and Their Children VAWC Act sa 2004. Nakalatid sa ordinansa nga gikinahanglan ang pag adopt sa syudad sa Butuan sa tanang palisiya nga nahilakip sa universal declaration sa human rights, kombensyon sa pagpawagtang sa tanang klase sa deskriminasyon kontra sa mga kababayen-an, kombensyon sa katungod sa mga kabataan, 1987 Philippine Constitution ug ang uban pang balaud sa nasud. Base sa Section 4 sa ordinansa apil sa coverage niini ang tanang health sectors nga gilangkuban sa local government unit uban sa health facilities sama sa Butuan Medical Center ug Primary Main Health Center District, DOH health care facilities ug attached agencies, Private hospital ug Private Primary Care Facilities. Magmugna usab og Technical Working Group nga pangunahan ni Mayor Lagnada uban sa nagkadaiyang buhatan sa LGU Butuan, Regional agencies ug National agencies. Mas gipalig-on sa City Government sa Butuan ang ordinansa sa pagpangusog ni Mayor Lagnada isip paghatag sa dakong bili ug katungod sa tanang kababayen-an ug kabataan ingon man ang tibook pamilya nga mahatagan sa proteksyon og respeto. Hinungdan ang bisan kinsa nga mosupak sa ordinansa dunay silot ug penalty nga muabot sa 5,000 pesos ug mag-atubang sa administratibong liability.