Pormal nang gi-ablihan ang Inter-Barangay Cluster Basketball Tournament sa dakbayan sa Butuan adlawng Sabado nga gipahigayon sa San Vicente Covered Court, Barangay San Vicente ning syudad. Walo ka cluster nga gilangkuban sa tag walo ngadto sa napulo ka mga barangay ang misalmot sa tournament. “This is an annual activity nga atong ipahigayon para atoang tagaan og importansiya nga madevelop ang skills through sportsmanship. This is just more than winning but what we wanted to involve is the spirit of sportsmanship as well as camaraderie,” tipik sa mensahe ni City Education Development Department Acting Department Head, Rosalito Libres. Matag adlawng Sabado ug Dominggo lang ipahigayon ang dula nga molungtad hangtud Mayo deysi siete. Samtang, una pa nagsugod ang dula sa unang cluster, gipailawom sa drug test ang mga players aron masigurong wala sila malambigit sa paggamit sa iligal nga druga. Ang Inter-Barangay Cluster Basketball Tournament kabahin sa kasaulogan sa Balangay Festival 2025.