Gihingusgan sa lokal nga panggamhanan sa Butuan pinaagi sa City Building Management Department kun CBMD ang pagpatuman sa pagtangtang sa mga poste nga halos lima na ka dekada sa syudad nga dilapidated na ug mga wires nga wala na gigamit, Mayo uno. Sumala sa CBMD dako-dako pa kini nga responsibilidad sa opisina hinungdan magpadayon kini hangtud matanggal na tanan ang mga posteng kahoy ug wires nga wala nay gamit tungod nakahugaw kini sa kadalanan ug posible pang makamugna og aksidente. Gipahibalo sab sa CBMD ang mga fiberdrop installer nga sundon ang designated traverse assignment area. Mipaabot sa dakong pasalamat ang tibook pwersa sa lokal nga panggamhanan sa Butuan sa pagpanguna ni Mayor Ronnie Vicente Lagnada sa tanang partners nga naglangkub sa ANECO Linemen, Marstel PLDT ug Mirait GLOBE tungod nahimong posible ang nasangpit nga kalihokan. Buot ni Mayor Lagnada nga mahinlo na ang mga dalan alang sa pagpangandam nga mahimong smart city ang Butuan.