Gikalipay ug nagpasalamat si Jovanie Samosino usa ka vegetable farmer sa Barangay Anticala ning syudad nga namugna ang Agriboost project sa pagpanguna sa lokal nga panggamhanan sa Butuan. Kini aron matabangan ang mga mag-uuma sa syudad ilabina ang mga vegetable farmers nga sama kaniya tungod natabangan na kini sa problema sa produksyon ug market. Si Samosino usa sa migradwar ug nakabenipisyo sa Farmers Field School kun FFS Training nga gipangunahan sa City Agriculturist Office. Naglaum kini nga daku ang kitaon sa iyang pagpananum karon gumikan sa agriboost project nga hugtanung gisuportahan sa city government sa Butuan sa pagdumala ni Mayor Ronnie Vicente Lagnada pinaagi sa pagpahigayon og mga pagbansay aron matudluan sa insaktong pamaagi ug pag atiman sa mga tanum ingon man ang paghatag kanila og semilya, materyales ug labaw sa tanan ang pagsiguro nga dunay saktong buyer sa insaktong presyo. “Sa karon mikometar ko og kamatis, talong ug ampalaya sa kamatis 200kilos akong gikomet unya sa talong 50 kilos sa ampalaya 30 kilos ra. Daku kaayo og tabang ang FFS training kay dugang kahibalo labi na ing-ani sa gulayan sama sa pagbutang og plastic molts ug ang pag-utro-utro nga sa sunod lahi napod ang itanum. Sa karon medyo naglaum mi nga dako-dako gyod ang kitaon labi na kay off-season mahal-mahal gyod ang gulay ron.” Sumala ni Jovanie Samosino. Admitado si Jovanie nga dakung hagit kaniya ang sunod-sunod nga pagbundak sa ulan apan nanghinaut kining makalingkawas ra ang iyang mga tanum tungod mao lamang kini ang iyang panginabuhian alang sa iyang pamilya. Nanghinaut sab kini nga magmalahutayon ug molig-on ang programa alang sa pag-uswag sa kahimtang sa mga mag-uuma sa syudad nga maoy tinubdan sa pagpadako sa produksyon sa gulay og dili na kinahanglang muadto sa laing dapit ang mga vendor sa syudad sa Butuan.