Nagpadayon karon ang Urban Drainage Project sa lokal nga panggamhanan sa syudad sa pagpanguna ni Mayor Ronnie Vicente Lagnada pinaagi sa City Engineers Office ug Department of Public Works and Highways kun DPWH. Makita sa gitrabahong mga urban drainage sa may North Montilla Boulevard ning syudad nga ang kanhing karaang mga dagkong kanal nga abli asa pwedeng labayan og basura karon usa na kini sa nakakonektar sa urban drainage ug mas gipanindot pa. Sumala sa duha ka Butuanon nga sila Evelyn Prisco ug Ela Marie Osorio dakung kausaban ug kalambuan ang dala sa urban drainage project tungod wala na nakasinati og sobrang pagbaha ang syudad human kini napatuman. Nagtinabangay ang lokal nga panggamhanan sa Butuan pinaagi sa City Engineers Office ug DPWH nga mapunduhan ang proyekto aron hingpit nang maangkon sa katawhang Butuanon ang hapsay, limpyo ug dili na makasinati og sobrang pagbaha ang syudad. Ang pagpalambo sa imprastraktura usa sa gitutukan ni Mayor Lagnada tungod makahakot kini og mga imbestor nga mobubu og negosyo nga makahatag og panginabuhian sa tanan ug motaas ang ekonomiya sa syudad.