Daghan sa mga kooperatiba sa tibouk rehiyon sa Caraga ang nisalmot sa unang adlaw sa kasaulugan sa Cooperative Month nga gipahigayon sa LMX Convention Center, Barangay Bancasi ning syudad. Produktibo ang unang adlaw sa kasaulugan nga gisugdan nila sa usa ka Zumba. Gisundan kini sa Training on Product Development nga gihisgutan ang importansya sa packaging sa produkto, label niini, ang safety sama na sa pag pa ilawom sa produkto sa nutrition facts ug shelf life pinaagi sa mga eksperto, story o background sa pag mugna niini ug uban pa. Pipila lang kini sa giandam nga aktibidad sa Cooperative Development Authority kun CDA Caraga alang sa mga kooperatiba sa Caraga nga magamit sa pagpalambo sa ilang mga produkto. Ang Cooperative Month usa ka bulan nga selebrasyon agig pag hatag og suporta sa mga kooperatiba ug sa mga bag-ong namugna nga koop.