Nakasakmit og mga medalya ang tulo ka estudyante gikan sa Philippine Science High School Caraga Region Campus sa natigayong Hong Kong International Science Olympiad Competition miaging bulan. Nakuha nila Elan Tomaneng ug Cris Adrielle Costelo ang Gold Medal sa Hong Kong International Science Olympiad Competition. Samtang nakuha ni Julia Manatad ang Merit Awardee sa pareho nga kompetisyon. Senior Secondary Category ang gisalmutan sa tulo ka estudyante ug ang ilang mga nakaatbang gikan sa managlahing nasud sa tibouk kalibutan. Sumala ni Dr. Ann Tibe, Head Coach sa mga bata nga ang preparasyon nila dunay kauban nga disiplina tungod sa oras nga gigahin alang sa mga training. Mipaabot og pagtimbaya ang lokal nga panggamhanan sa Butuan sa tulo ka mga estudyante lakip na sa tunghaan sa bag o na sab nga naangkong kadaugan. Gitakda ang virtual awarding ceremony karong Hulyo 30, 2023 via OCEC's YouTube Channel.