Nahimung benepisyaryo sa communication equipment ang tulo ka barangay sa Butuan nga gilangkuban sa Barangay Anticala, De Oro ug Mandamo. Pormal nga gitunol ang mga communication equipment sa lokal nga panggamhanan sa Butuan gikan sa Philippine Disaster Resilience Foundation kun PDRF adlawng Martes. Atol sa turnover ceremony, nipirma sila Punong Barangay Antonio Masamayor sa Barangay Anticala, Punong Barangay Randy Jagonos sa Barangay De Oro ug Punong Barangay Jose Cataluña Jr. sa Barangay Mandamo og deed of donation tali na sa PDRF sa pagpanguna ni President Rene "Butch" S. Meily ug barangay council sa tulo ka barangay. Napili ang Barangay Anticala, Barangay De Oro, ug Barangay Mandamo nga mahimong Pilot Barangay sa Communication Equipment tungod ang nasang pit nga mga Barangay walay signal, accident prone area, ug apektado sa kalamidad sama na sa landslide. Gikalipay ug mapasalamaton ang tulo ka Punong Barangay sa ilang nadawatan nga mga ekipo. Para kang Punong Barangay Randy Jagonos, hagit alang kanila ang kalay-on sa ilang Barangay dugangan pa nga pipila sa area niini walay signal, maong lisud para kanila kung dunay aksidente ug sagonson ang ulan tungod mag lisud sila og communicate alang sa pag pa rescue. "It would be better gyud no nga kini nga mga equipment ma utilize na namo at its maximum, full utilization, maoy target ni Barangay,” sumala ni PB Randy Jagonos. Alang kang Punong Barangay Antonio Masamayor, kada purok ang ilang pagpanghatag og impormasyon sa mga residente sa ilang Barangay kung ugaling dunay kusog nga ulan. Lisud para kanila tungod daghan sab nga mga residente ang nagpuyo sa Barangay Anticala labi na ang mga residente nga doul sa Taguibo River. Dili ikalimod ni Punong Barangay Jose Cataluña Jr., nga manual lang ang ilang information dissemination panahon sa kalamidad tungod kulang sila sa gamit maong dako ang ilang pasalamat kang City Mayor Ronnie Vicente Lagnada, PDRF ug Australian Government sa oportunidad nga gihatag kanila. Ang tulo ka mga Barangay mao ang gipasa sa City Disaster Risk Reduction and Management Department kun CDRRMD, dayon kining gi-evaluate sa taga PDRF tuig 2023 aron makita ang actual nga kahimtang pag-abot sa signal lakip na kung unsa ka delikado ang lugar panahon sa mga kalamidad.