"Daku kaayo among kalipay nga gihatagan me og extension. Daku na kaayo ni og tabang sa amoa nga mga mamaligyaay.” Kini ang pahayag ni Victoria Corazon Acierto, usa ka Lokal MSME sa syudad sa Butuan human nga nahibaluan nga extended ang pagpamaligya nila dinhi sa City hall Grounds. Admitado si Acierto nga sa usa ka semana nila nga pagpamaligya, dunay adlaw nga kusog ug duna sab adlaw nga hinay apan mapasalamaton gihapon siya tungod daku na kini og tabang nga mahalinan sila. Plano sa mga traders nga butangan nila og uban pang mga produkto para mas daghan ang ma engganyo ug mobisita para mopalit dinhi sa Tabo ug Siab sa Cityhall. Usa lang si Acierto sa walo ka mga traders nga nipartisipar sa Tabo ug Siab sa City hall subay sa kasaulugan sa MSME Week. Mapasalamaton sab siya sa Lokal nga Panggamhanan sa Butuan sa suporta nga gihatag alang sa mga negosyante nga sama niya ug nanghinaut nga mas daghan pa ang aktibidad nga ipahigayon sa umaabot para matabangan ilang negosyo ug ilang pamilya.