Mi-abiso ang lokal nga panggamhanan sa Butuan sa pagbalhin sa swimming event sa Triathlon gikan sa Masao Beach ngadto na sa Manapa, Buenavista, Agusan del Norte ugmang adlawa. Subay sa gihimung pagtuon balik sa water quality assessment sa Beach Eco- Watch Program sa Department of Environment and Natural Resources pinaagi sa Environment Management Bureau kun EMB nakitang taas ang presensya sa fecal coliform ilabina tong bulan sa Marso ning tuig sa pipila ka mga beach resort sa Barangay Masao ning syudad. Ang Fecal Coliform gikan sa hugaw sa tawo, hayop ug patay nga hayop. Gituohan usab nga posibleng anaa sab kini sa basura. Subay sa resulta girekomenda sa City ENRO ug base usab sa manifestation sa City Health Office nga dili usa liguan ang dapit. Kini usab ang hinungdan nga nausab ang venue sa swimming event sa Triathlon. “Naa mi mga recommendations considering pod sa mamahimong impact niya sa health ug safety sa mangaliguay sa beach. Tungod niini among gipahibalo ang barangay nga sila una ang magpahibalo sa tanan kabahin niini nagsuggest mi nga idiscourage una ang pagligo pero lagi kay dili man nila mabut-an. Ang ila pod kadtong mga na identify nga mga measures nga makapareduce sa fecal coliform like sa presence sa stray animals kay mao mana recent investigation sa City Health Office. Ang City Health Office nagconduct man og investigation kay nakita man nga daghan ang contributing factors nga posibleng masulbad ra sa barangay. Isa pod niana ang septic tank, ni-commit man ang barangay nga ilang tan-awon ang mga households ug sa mga establishments. So tan-awon ang design sa septic tank” Sumala ni Jess Ivan Saburao Supervising Environmental Management Specialist. Sa karon, gi abisuhan ang mga opisyal sa barangay sa striktong pagpatuman sa kahinlo sa dapit asa kinahanglan nga tanang panimalay dunay konkretong septic tank, gidili na ang mga binuhing iro nga maglakaw-lakaw sa daplin sa mga resort ug saktong pagdumala sa basura.