Nagcourtesy call ang mga personahe gikan sa Department of Agriculture-Philippine Rural Development Project, City Agriculture Office, City Engineers Office ug City ENRO sa mga konsehal sa syudad sa Butuan nga sila City Councilor Rey Desiata ug Arturo Gado kaganinang hapon. Kini aron hisgutan ang ipahigayong Sub-Project Appraisal sa ipatumang Farm-to-Market road project sa Barangay Bugsukan, De Oro ug Camayahan sakop sa syudad sa Butuan asa gigahinan og pondo nga nagkantidad og kapin 500 milyon pesos. Subay niini, nakatakda ugmang adlawa, Oktubre 11 ang ipahigayong Sub-Project Appraisal sa nasangpit nga mga barangay aron makita ang dapit ug masayran ang mga posibilidad nga maapektuhan sa proyekto. Sumala nila City Councilor Rey Desiata ug Arturo Gado usa kini sa dakung kalambuan sa tulo ka barangay nga mahimung lahos na ang pagbyahe sa mga mag-uuma sa tagsang abot padulong sa merkado ug sayon na usab ang pagsulod sa mga negosyante. Gumikan niini, mipaabot sa dakong pasalamat ang mga konsehal sa DA-PRDP sa padayong pakigtambayayong sa lokal nga panggamhanan sa Butuan aron matabangan ang katawhan ug makab-ot sa syudad ang progresibong ekonomiya.