Gibisita sa City Trade, Industry and Investment Promotion Office kun CTIIPO ang pipila ka mga establisamento sa syudad sa Butuan aron susihon ang Suggested Retail Price kun SRP sa mga produkto, miaging semana. Nakitaan nga kasagaran sa mga namaligya sa public market walay presyo nga gibutang sa ilang mga baligya. Tungod niini, ipailawom sa CTIIPO ang mga vendors sa orientation kalabot sa pagbutang og presyo sa ilang mga produkto nga ipamaligya. Kini aron dali ma identify sa mga consumer ang presyo sa ilang paliton. Gawas sa CTIIPO kauban sab nila ang pipila ka mga opisina sa Lokal nga Panggamhanan sa Butuan nga gilangkuban sa City Agriculturist Office, City Business Permits and Licensing Office, City Treasurer's Office, City Health Office ug uban pa para sa pag susi sa mga business permits, timbangan , sanitation sa lugar ug kalidad sa mga produkto. Ang inisyatibo nga gibuhat suportado ni City Mayor Ronnie Vicente Lagnada aron ma protektahan ang mga consumer ug walay mga panlimbong nga mahitabo.