Aprobado na sa Sangguniang Panlungsod sa Butuan City sa pagpanguna ni Vice Mayor Lawrence Fortun ang SP Resolution no. 334-2022 o ang resolusyon nga pagtugot sa city government sa Butuan pinaagi kang Mayor Ronnie Vicente Lagnada sa ipahigayong pinirmahay sa Memorandum of Agreement MOA tali na sa Provincial Government of Agusan del Norte, Municipal Government of Buenavista, Department of Environment and Natural Resources-Regional Office 13, National Commission on Indigenous Peoples NCIP, Butuan Global Forum, Caraga State University CSU, Central Mindanao University CMU, ug Father Saturnino Urios University FSUU kabahin sa Project Area Suitability Assessment kun PASA alang sa Mt. Mayapay aron padayon kining maproteksyonan ilawom sa kategorya sa Expanded National Integrated Protected Areas System NIPAS Act sa 2018. Kini nga lakang subay usab sa House Bill no.2267 nga gipangamahanan ug gisponsoran ni Vice Mayor Fortun ug kanhing Representative of the First District of Agusan del Norte. Siya naningkamot nga madeklara ang Mt. Mayapay isip protected area sa syudad sa Butuan aron pagsiguro ang konserbasyon, maproteksyunan ug mamintinar ang essential ecological process ug life support system, masiguro ang malahutayong mga resources nga anaa sa dapit, mamintinar ang natural nga kundisyon sa dapit ug dunay maayong pagdumala sa physical nga integridad ug biological diversity niini. Kini nga resolusyon gipangunahan ang pagpangamahanan ni City Councilor Victor Plaza sa pag abag sa mga kauban sa konseho. Subay niini gi-aprobahan sa city government sa Butuan pinaagi ni Mayor Ronnie Vicente Lagnada ang pondo aron magamit sa ipahigayong PASA alang sa Mt. Mayapay samtang ang ubang Partido o mga ahensya mikometar usab sa suporta pinaagi sa pagpaabot sa technical expertise aron malampusong mapahigayon ang PASA.