Gi-aprobahan na ni Vice Mayor Law Fortun ang SP Resolution no. 351-2022 nga gipangamahan ni SK Federation President Cynth Zephanee Nietes Committee Chair sa youth, sports and recreation sa pag -ila sa kadaugan ug kalampusan apil ang paghatag og qualifier incentives sa mga Butuanong Arnis Team sa Wekaf World Championship Philippine adtong bulan sa Hulyo 16-22 tuig 2022 sa Mandaue City, Philippines. Ang paghatag sa insentibo subay sa SP Ordinance no. 6169-2020 o mas naila nga Sports Incentives Ordinance sa Butuan City nga gipangamahan ni City Councilor Cromwell Nortega ug giaprobahan ni Mayor Ronnie Vicente Lagnada. Kini isip paghatag suporta sa mga atleta sa mga galastuson panahon sa kompetisyon ug aron usab mas madasig ug maningkamot kini nga kab-oton ang kadaugan sa bisan asang kompetisyon nga salmutan. Ang mga Arnis Team nga makadawat sa insentibo mao sila Rhanny James Bagaipo, gold medalist nga makadawat og 50,000 pesos, Kristine Pecatoste Silver Medalist nga makadawat og 30,000 pesos, Gerald John Mesa National Qualifier 20,000 pesos ug madawat usab ang 20,000 pesos ni Remichael Almodiel isip National Qualifier. Pangunahan sa City Sports Office ang proseso sa mga insentibo aron makuha na kini sa mga atleta. Gipaningkamutan sa lokal nga panggamhanan sa Butuan nga mahatagan sa igong suporta ang mga atleta ilabina naghatag kini og dakung dungog sa syudad sa Butuan.