Gihatagan sa pasidungog sa Center for Local and Regional Governance sa University of the Philippines ang Sangguniang Panlungsod sa Butuan human nga malampusong nakab-ot niini ang labing taas nga mga rekisitos sa Legislative Systems Management Course. 21 sa libuan ka mga Sanggunian ang nakadawat niining nasangpit nga pasidungog. Ang mga gipasidunggan gisusi ug gipili base sa rekomendasyon sa Course Chair ug Tutors gikan sa University of the Philippines - National College of Public Administration and Governance (UP NCPAG). \ Ang maong kurso nga gipahigayon sa panag-uban sa Vice Mayors League of the Philippines gilangkuban sa mga leksyon ug module kabahin sa human resource management, committee management, codification, ug digital transformation, ug uban pa. Personal nga gidawat ni Bise Mayor Lawrence “Law” Fortun ang pasidungog, uban nila Sangguniang Panlungsod Secretary Atty. Pearl Joy Salas-Dalingay, Chief of Staff – Office of the Vice Mayor Kevin Hinaloc, Acting Chief sa Legislative Research and Development Division Atty. Precious Tancinco, Acting Chief, Planning and Data Management Division Ralph Neri, ug Acting Chief, Plenary and Committee Affairs Division Rochelle Valencia. “Ang maong pasidungog usa ka bililhon nga pag-ila labi na sa mga paningkamot sa atong SP Secretariat, ang mga masaligan nga mga indibidwal luyo sa atong mga nakab-ot. Mahinungdanong papel ang ilang gihuptan sa pagpaniguro nga episyente, responsable ug maligdong ang proseso sa atong lehislasyon,” sumala ni Bise Mayor Lawrence Fortun. “Mapasalamaton usab ako sa atong mga konsehal nga migahin sa ilang panahon ug kahibalo alang sa direksyon nga atong kolektibong gitakda, mitimon sa ilang mga komitiba aron makab-ot ang mga importanteng balaodnon, ug nagtrabaho ug doble aron masiguro nga matuman ang atong mga timelines,” dugang ni Bise Mayor Fortun. Gawas sa nasangpit nga pasidungog nakadawat usab sila sa ilang Certificates of Completion sa Legislative Systems Management Course gikan sa UP CLRG atol sa maong Completion and Recognition Ceremonies.