Gidawat sa sobra kwatro syentos nga mga estudyante sa syudad ang tabang pinansyal pinaagi sa Assistance to Individual in Crisis Situation kon AICS nga programa ilawom sa Department of Social Welfare and Development Office nga gipahigayon sa Barangay Imadejas, Covered Court kaganinang buntag. Ang mga nakadawat mao ang mga College Students, Senior High School, ug High School students aron magamit sa ilang pag eskwela. Kini sila ang mga nahimong eligible sa gipahigayong validation sa mga estudyante nga mipasa sa mga rekistos. Ang Educational Assistance nga gihatag magpadayon nga ihatag sa mga labing nanginahanglan nga mga estudyante. Ang Educational Assistance sa AICS usa ka tabang sa mga estudyante nga naglisud ang pamilya o anaa sa krisis. Labing mapasalamaton ang mga estudyante sa tabang pinansyal nga gihatag kanila tungod daku kining tabang sa ila labi na sa ilang pagbayad sa tuition ug sa mga proyekto sa eskwelahan. Sa mga gusto mo avail niini mamahimong muadto sa buhatan sa City Social Welfare and Development Office aron makabalo sa mga angay nga buhaton ug rekisitos nga kinahanglan sa maong programa. Nagtambayayong ang mga opisina sa gobyerno nga gilangkuban sa DSWD, Senatorial Office ni Sen. Imee Marcos, Lokal nga Panggamhanan sa pagpanguna ni Butuan City Mayor Ronnie Vicente Lagnada pinaagi sa CSWD ug PESO.