Admitado ang City Engineers Office nga makasinati gihapon sa pagbaha ang syudad sa Butuan kung kini kusog ang pagbundak sa ulan o kung kini muabot sa 50mm per hour pataas ang volume sa tubig ulan. Kini gumikan sab sa mga gipatumang mga proyektong urban drainage sa syudad. “Sa karon on-going ang trabaho sa urban drainage hangtud nga dili pa kini mahuman dili pa masulbad ang problema sa baha while on-going pa atong trabaho naa gyod inconvenience. Ang procedure man gyod sa trabaho sa atong drainage mag-una dapat sa outhole labi na sa J.C Aquino kay naa man mga business establishment nga dili pod pwede nato ipasira kay para masunod ang atong methodology sa pagconstruct. So karon wala gyod siya naganid mao ng ang nahitabo aron makaminimize sa cost sa trabaho kanang mga exit nga water sa normal nga panahon sampungan na nila kay para ipump out nila ng tubig kay para kini sa gicast nga concrete para himuong box. So mao ng unpredictable man atong panahon karon nga mukalit rag ulan wala man to naablihan kay -on going man ang trabaho mubaha gyod na diha.” Kini nagpasabot nga samtang nagpadayon ang konstruksyon sa urban drainage makasinati gyod sa pagbaha tungod temporaryong sampungan ang mga existing drainage aron mahuman ang trabaho. Samtang wala na makasinati sa pagbaha ang ubang bahin sa syudad asa nahuman na ang konstruksyon sa urban drainage. “Sama diha sa Post Office wala na nakasinati sa baha same raman ang complaint sa mga tawo karon ug sauna nga while gatrabaho ta gabahaan na sila pero pagkahuman karon wala naman nakasinati sa pagbaha diha sa Post Office nga naay on-going nga trabaho naa didto ang baha like Montilla Boulevard sa north naay baha karon kay naa didto ang trabaho.” Sa karon anaa pa sa 25% ang dagan sa kinatibuk-ang proyekto nga gipunduhan sa city government sa Butuan pinaagi sa City Engineers Office ug national government pinaagi sa DPWH hinungdan giawhag ang pagsabot sa tanan. Subay niini giklaro sa buhatan sa City Engineers Office nga hangtud dili mulagpas sa design capacity sa urban drainage ang pagbundak sa ulan makasigurong wala nay masinating pagbaha sa syudad sa Butuan apan kung mulapas kini sa 50mm per hour makasinati gihapon sa pagbaha. “Kung musobra pata ana dili na economical ang atong project sa situation gahapon is more than that wala lang ni last og 24 hours kusog kaayo to siya epekto pod sa global warming.” Positibo ang nasangpit nga buhatan nga masulbad ang problema sa baha sa syudad sa Butuan hinungdan gihangyo ang pagsabot sa tanan hangtud mahuman ang proyekto. Kini tungod gihimo nga dunay saktong plano subay sa direktiba ni Mayor Ronnie Vicente Lagnada alang sa mas progresibong syudad sa Butuan sa umaabot nga panahon.