Miresulta nga positibo ang natigayong Smart City Roadmap Stakeholders Forum didto sa Watergate Pavilion ning syudad, Enero 28. Gisalmutan kini sa nagkadaiyang regional line agencies ug stakeholders. Dinhi migawas ang mga ideya ug shared vision sa mga partner agencies ug stakeholders alang sa kalambuan sa Butuan City nga mamahimong smart city atol sa gipahigayong workshop. Ang City Government sa Butuan (CGB) pinaagi sa City Planning and Development Department uban ang Department of Science and Technology (DOST) Caraga pinaagi ni Regional Director Noel M. Ajoc nagtinabangay sa pagmugna sa Smart City Roadmap. Ang CGB ug DOST parehong nagtinguhang makuha ang strategic framework padulong sa Butuan City smart city transformation. Ang Smart City Roadmap nakasentro sa 6 pillars nga naglangkub sa Smart People, Smart Mobility, Smart Living, Smart Environment, Smart Governance ug Smart Economy. Gihingusgan ni Mayor Ronnie Vicente Lagnada nga dunay sundon nga unom ka pillars ang roadmap isip giya ug alignment sa tanang ipatumang programa ug proyekto.