Andam musuporta ang mga miyembro sa Sangguniang Panlungsod sa Butuan sa usa ka Butuanon nga si Engr. Shiela Mae Sabordo pinaagi sa pagpasa og SP Resolusyon aron mahatagan kini og pinansyal nga assistance nga magamit sa salmutang kompetisyon sa America nga ang World Championships of Performing Arts kun WCOPA. Sa SP session kagahapon gibutyag ni City Councilor Cromwell Nortega, Committee Chairman sa good government, ethics, human rights, laws, rules and styles nga pangunahan niini ang pagduso sa resolusyon alang sa ihatag nga financial assistance kang Sabordo uban sa tanang miyembro sa sangguniang panlungsod. Mukabat sa halos 300,000 ang gikinahanglan ni Sabordo apan anaa lamang sa 100,000 ang ikagarantiya sa SP. Kini kung maaprobahan sa finance committee sa pagpanguna sa City Budget Office. Gisiguro sa LGU Butuan pinaagi ni Mayor Ronnie Vicente Lagada nga masuportahan ang tanang talented nga Butuanon aron mas madasig kining kab-oton ang kadaugan ug makahatag og inspirasyon ug dungog sa syudad sa Butuan.