Hugtanung gilusad sa lokal nga panggamhanan sa Butuan pinaagi sa City Traffic and Transportation Management Department CTTMD ang Road Safety Program miaging semana. Kini aron mapalapdan ang public awareness kalabot sa road safety pillars nga naglangkub sa Road Safety Management, Safer Vehicles, Safer Road Users, Post-Crash Response ug Safer Driving Environments aron mukunhod ang mahitabong mga aksidente sa nagkadaiyang kadalanan. Miabot na sa 52.9 porsyento ang nahitalang motor accidents asa sagad ang nalambigit niini ang mga motorsiklo ug nahitabo sa peak commuting hours sa may congested routes areas gikan Barangay Ampayon padulong Barangay Libertad. Gani, sunod-sunod karon ang mga public awareness programs sa CTTMD kalabot sa road safety policies ug procedures alang sa luwas ug hapsay nga byahe sa tanan. Ang kalihukan gisalmutan sa mga opisyales ug representatives sa 86 barangay sa syudad sa Butuan ug gipa-ilawom usab sa workshop isip pagpangandam sa mga panahon sa urgent situation.