Padayong gidasig sa City Agriculture Office uban ni City Councilor Arturo Gado, Committee Chairman sa Agriculture, Fisheries ug Agro Forestry ang mga Rice Farmers ning syudad nga motanum gihapon og organic rice. Kini atol sa gipahigayong Organic Farmers Field Day Tour ug Harvest Festival sa Caraga State University kun CSU Agricultural area. Gipahigayon sa nasangpit nga buhatan ang field day tour aron makita sa mga mag-uuma ang aktuwal nga tubo sa organic rice asa mas mapalapdan ang interes niini nga mogamit og organikong variety sa humay. Dinhi usab makita nga ang nasangpit nga variety dili magpaulahi nga makahatag sa maayong ani ug kita sa mga mag-uuma ingon man mamahimong tinubdan sa padayong pagpataas sa organic rice production sa syudad. Gihingusgan kini sa lokal nga panggamhanan sa Butuan pinaagi sa City Agriculture Office aron padayong mapromote ang paggamit sa organic rice subay sa direktiba ni Mayor Ronnie Vicente Lagnada.