Gihangyo ni City Budget Officer Armando Perez Sr. ang tanang Department Heads sa lokal nga panggamhanan sa Butuan nga tutukan ug ipahigayon ang striktong evaluation sa bag-ong reorganizational structures aron makasiguro nga mo-align ang gikinahanglang pondo alang sa tuig 2024 ug subay sa direktiba ni Mayor Ronnie Vicente Lagnada. Kini atol sa gipahigayong 2023 Budget Forum for 2024 Budget Preparation kagahapon sa Sangguniang Panlungsod Session Hall sa pagpanguna sa City Budget Office pinaagi ni Mayor Lagnada nga gitambungan sa mga Department Heads sa suporta ni Vice Mayor Lawrence Fortun ug SP members. Subay sa kalihukan unang nagpresentar ang City Treasurers Office sa Receipts o Income sa syudad sa Butuan nga gikan sa regular sources, local sources, business ug service income. Sa presentasyon nakita nga ubos ang koleksyon sa real property tax apan giklaro nga base kini sa guidelines sa Department of Finance. Apil usab nga gipakita ang Expenditure o ang Comparative Fund Utilization Report sa tuig 2018 hangtud Hunyo 2023 sa syudad pinaagi sa City Accountant’s Office. Sa presentasyon sa City Planning and Development Office kun CPDO gitutukan ang Institutionalization sa Planning ug Data Management Objectives. Giawhag sa CPDO ang tanang Department Heads nga magbutang na gayod og permanenting Planning Officer aron magtukma na ang kolektahong data. Gibutyag ni Mayor Lagnada sa tanang Department Heads nga tan-awon ang posibilidad nga magkig partner sa ubang ahensya aron masuportahan ang mga programa alang sa mga lahi-lahing sektor. Sa kinatibuk-an sa aktibidad gipasalamatan ni Mayor Lagnada ang tanang Department Head sa dakong kausaban sa pagdumala sa matag buhatan aron mahatag ang episyenteng serbisyo. Nakatakda ang budget deliberation sa bulan sa Agosto uban sa mga SP members sa pagpanguna ni Vice Mayor Lawrence Fortun.