Gitagbo sa lokal nga panggamhanan sa Butuan ang mga nagkadaiyang sektor ug organisasyon sa dakbayan alang sa usa ka Public Consultation mahitungod na sa bag-ong City Ordinance no. 16-023-2025 o ang gihimong revision sa City Ordinance No. 7026-2023 nga mas naila sa Transportation ug Traffic Management Code sa Butuan City. Gipangunahan ang Public Consultation sa Sangguniang Panlungsod sa komitiba sa Transportation ug Traffic Management ni Committee Chairperson Konsehal Ferdinand Nalcot kauban ang City Transportation and Traffic Management Department isip implementing office sa ordinansa. Daghan ang bag-uhon sa ordinansa nga nakasentro sa probisyon sa komprehensibong framework sa enforcement sa traffic rules apil na ang pagamit sa mga private streets nga accessible sa publiko. Lakip sab nga matubag ang rekisitos sa sistema sa transportation alang sa luwas nga kadalanan ug hapsay nga trapiko. Gipaminawan sab sa komitiba ang mga suhestyon ug mga mulo sa nagkadaiyang sektor sa katuyuan nga mamahimong hapsay ang pagpatuman niini. Gilantaw sa LGU Butuan ang kaayuhan sa kinatibuk-an hinungdan sunod -sunod ang pagpahigayon sa konsultasyon aron masabtan ug mahatagan sa katin-awan ang tanan. Gitambungan ang Public Consultation sa Transport Group, Business Sector, Academe, Religious Group ug uban pa.