"Daku ko og kalipay tungod bisan pag inahan nako, gihatagan gihapon me og oportunidad nga ishowcase among kaugalingon ug mag hatag og inspirasyon sa mga kababaihan.” Kini ang pahayag ni Naricar Manpatilan, kandidata sa Barangay Fort Poyohon human siya nakoronahang Ginang Butuan 2023 kagahapon sa Robinsons Place Butuan. Wala siya magdahom nga makadaog siya tungod alang niya garbo na nga morepresenta sa ilang barangay ug makahatag og higayon nga dunay tingog alang sa mga kababaihan. 1st Runner up si Jamaica Mae Mondano nga taga Barangay Libertad, 2nd Runner up si Neliza Bambe nga Taga Barangay Limaha, 3rd Runner up si Charidel Escamillan sa Barangay Ampayon ug 4th Runner up si Mary Ann Seo sa Barangay San Vicente. Nakuha sab sa Barangay Libertad ang Best in Production Number ug Best in Sports Attire, Miss Photogenic si Barangay Limaha ug Miss Congeniality si Barangay Tiniwisan. Sa mensahe nga gipaabot ni City Mayor Ronnie Vicente Lagnada pinaagi kang Konsehal Joseph Omar Andaya ang Ginang Butuan 2023 usa ka aktibidad nga mag hatag og higayon sa mga inahan nga ipakita ang ilang talento lakip nga malingaw sab sila sa kasaulugan sa National Women's Month. "There has been a significant change towards growth and progress ever since women have been given same rights and privileges" mensahe ni Mayor Ronnie Vicente Lagnada pinaagi kang Konsehal Joseph Omar Andaya. Deysi otso ka mga kandidata gikan sa managlahing barangay sa syudad ang misalmot sa Ginang Butuan 2023 nga nagtigi sa nagkadaiyang kategorya. Dayong nipili ang mga hurado sa Top 5 nga nipailawom sa Question and Answer portion asa ang mga pangutana dunay kalambigitan sa hagit ug kasinatian isip pagka babaye ug inahan. Anaa ang presensya sa mga opisyal nga sila Konsehal John Gil Unay, Konsehal Eduardo Gonzales, Konsehal Ehrnest John Sanchez, ug Konsehal Arturo Gado. Ang Ginang Butuan 2023 hugot nga gisuportahan sa Lokal nga Panggamahanan sa Butuan sa pagpanguna ni Mayor Ronnie Vicente Lagnada pinaagi sa City Population Office kauban ang Gender and Development kun GAD.