Gipatawag ang atensyon sa mga operators ug bar owners apil ang ubang establisamento ning dakbayan sa Butuan sa komitiba sa Public Order and Safety ni City Councilor Ehrnest John Sanchez alang sa Consultative Meeting. Kini gumikan sa nagkadaghang report ug reklamo nga pagbaligya og ilimnong makahubog sa mga menor de edad ug pagpasulod sa mga bar apil ang reklamo sa kabanha asa daghan nang apektadong residente. Dili na bag-o sa mga negosyante ang ordinansa o ang City Ordinance no. 5443-2017 nga pagdili sa pagbaligya og ilimnong makahubog sa mga lugar sa kalingawan ug establisamento sa mga menor de edad apan padayon kining misupak. Hinungdan subli kining gipahinumduman ni Konsehal Sanchez uban ni Konsehal Cherry May Busa isip Committee Chair sa Family, Womens and Childrens Welfare nga nag -awhag sa mga negosyanteng protektahan ang mga kabataan ug sundon ang nakalatid sa balaud. Buot ni Konsehal Sanchez nga strikto na kining mamonitor ug mapatuman ang balaodnon uban sa kapulisan. Hinungdan anaa ang presensya sa kapulisan sa pagdumala ni BCPO City Director PCOL Marco Archinue aron mapahugtan ang police visibility. Gihangyo usab sa mga opisyal ang koordinasyon sa opisyales sa mga barangay ug BPLD alang sa tukmang lakang kung mautro ang mga pagsupak sa ordinansa. Gilantaw lamang sa mga opisyales sa syudad ang hapsay nga syudad ug maproteksyunan ang mga kabataan hinungdan giawhag niini ang mga negosyante nga mosunod sa balaud alang usab sa hapsay nga pagpadagan sa negosyo nga walay si bisan kinsa nga maapektuhan. Kini nga pakigpulong suportado nila Konsehal Vincent Rizal Rosario, Victor Plaza ug John Gil Unay.