Personal nga gibisita sa mga personahe sa Department of Social Welfare and Development kon DSWD ang proposed site sa Mindanao Disaster Resource Center kon MDRC sa syudad sa Butuan, miaging semana. Ang mga personahe sa DSWD Central Office kauban ang DSWD Field Office Caraga ug mga personahe sa LGU-Butuan nagpahigayon og rapid assessment sa nasangpit nga proposed site. Mahinungdanon ang on-the-ground evaluation para sa pagtan-aw sa lokasyon kung igo ba kini alang na sa disenyo sa MDRC. Ang MDRC usa ka pasilidad nga mahimong butangan sa daghan nga ihap sa food ug non-food items sa DSWD. Kini ang magsilbi isip command post sa processing, storage, ug distribution sa relief items ug labing mahimo kining sole disaster resource center sa tibuok Mindanao. Kahinumduman nga miaging Marso 22, 2022, nag pirmahay og usa ka Memorandum of Agreement ang LGU Butuan ug DSWD pinaagi ni Mayor Ronnie Vicente Lagnada ug kanhi DSWD Secretary Rolando Joselito Bautista alang na niining donasyon sa lugar asa itukod ang MDRC sa Butuan. Ang gidonar nga 5 hectare sa LGU-Butuan sa may Barangay Pinamanculan maoy tukuran sa MDRC. Nakita nga ang Butuan City usa ka geographically ideal isip disaster resource center. Gitan-aw diri ang mga major roads nga nag konekta sa mga kasikbit nga syudad ug lungsod. Usa ka factor nga gikonsidera sab mao ang accessibility sa commercial airport ug duol nga major seaports sa syudad.