Pormal nga gi-ablihan ang Produkto Ipasigarbo sa Tabuan sa Agusan-Butuan kun PISTA Christmas Edition Trade Fair sa may Ground Floor sa SM City Butuan gawas sa UNIQLO, kagahapon. Makita sa PISTA Christmas Edition Trade Fair ang nagkalain-lain nga produkto nga usa sa gipaningkamutan sa Department of Trade and Industry Agusan Del Norte ug Caraga. Mapalit sab ang produkto sa barato nga presyo. Anaa sa 51 ka Micro, Small and Medium Enterprises kun MSME ang nag display ug namaligya sa ilang mga produkto. Sa 51, 41 niini food items samtang ang 10 mao ang non-food items. Mipaabot sa mensahe si Mayor Ronnie Vicente Lagnada pinaagi ni Konsehal Joseph Omar Andaya nga malipayon siya nga daghan na sa mga traders ang narehistro sa FDA lakip na ang ni participate sa karon nga PISTA Christmas Edition Trade Fair. Gi-awhag sab niya ang tanan sa pag bisita ug pag pamalit sa mga produkto sa mga MSME sa PISTA. Ang PISTA Christmas Edition Trade Fair molungtad hangtud karong Nobyembre 30, 2024.