Sa dekada 80, naila nga artista sa TV, Theater ug Pelikula sa Filipino Film Industry si Maruja Maestrado. Didto niya na develop ang iyang talento ug sa pakighimamat sa kadaghanan. Nahatagan siya og higayon nga maka trabaho sa Japan tuig 1986. Baynte ka tuig siya nga nanarbaho sa Japan aron sa makasuporta sa iyang pamilya. Tuig 2006, mibalik siya sa syudad sa Butuan ug wala nawala kaniya ang kinaiya sa pagtabang sa uban. Gi ila ang iyang pagkamatinabangon dihang gihatagan og pasidungog isip Most Outstanding Alumni sa Agusan National High School. Tungod sa nadawat niya nga pasidungog, mas nadasig pa siya sa pagtabang, magamay man kini o daku. Pipila sa iyang mga proyektong nahimo ang Feeding Programs, Gift Giving ug mga Community Outreach projects. Dinhi usab natawo ang Butuanon Choice Award diin gusto niya mahatagan og pag-ila ang mga Butuanon nga adunay gihimo nga kamaayo, pagtabang sa komunudad ug nagpakita og gugma para sa pagserbisyo sa katawhan. Nakuha niya ang iyang pinakauna nga International Award tuig 2022 asa giila siya isip Most Iconic Showbiz Personality and Humanitarian Advocate of the Year sa 5th Asia Pacific Luminare Awards. Sa parehas nga tuig, gidawat niya ang Outstanding Leadership Award gikan sa The Lions Club International; giila usab siya isip Outstanding in Entertainment, Business, and Inspiring Humanitarian Advocate of the Year sa Mindanao People’s Excellence Awards; gidawat sab niya ang Butuan’s Pride and Humanitarian Advocate and Inspiring Socio-Civic Leader sa 4th Gintong Parangal Awards 2022; nakuha usab niya ang Philippines’ Most Remarkable Stage, TV, and Movie Actress and Inspiring Humanitarian Advocate of the Year sa 3rd Dangal ng Lahi Awards. Miaging bulan sa Marso, gidawat niya ang pag ila gikan sa Vietnam International Achievers Award isip Actress and Humanitarian Advocate. Gikalipay ni Mayor Ronnie Vicente Lagnada ang mga indibidwal nga sama ni Maruja nga nagpadayon sa pagserbisyo sa komunidad ug nagpakita sa kamaayo nga mamahimong modelo sa tanan.