Nakabenepisyo sa Assistance to Individuals in Crisis Situations kun AICS Program sa Department of Social Welfare and Development ang mga Person with Disabilities sa Barangay Basag ug mga Senior Citizen sa Barangay Don Francisco ning syudad. Ang Senior Citizen nga si Leonora Colinares, residente sa Barangay Don Francisco ning syudad nalipay human nga nakadawat siya og 4,000 pesos nga benepisyo. Makapalit na matud pa siya og school supplies alang sa iyang mga apo ug makapalit na usab sa iyang kinahanglan sa pang adlaw-adlaw. Samtang ang usa ka Person with Disabilities kun PWD nga si Robert Daposala residente sa Barangay Basag ning syudad walay kabutangan sa gibating kalipay dihang nahilakip kini isip benipisyaryo sa AICS Program sa DSWD tungod makahatag na kini sa kinahanglanon sa iyang duha ka anak nga magtungha pa sa elementarya. Niabot sa 328 ka Butuanon ang nakabenipisyo sa AICS Program ug nakadawat og tag 4000 pesos. Usa kini sa hugot nga gipaningkamutan ni Congressman Jose Aquino II aron matabangan ang tanang nakasinati sa tumang kalisod nga makabangon ug makasugod og bag-ong panginabuhian bisan sa ginagmay nga paagi. Mapasalamaton sila Colinares ug Daposala sa tanang nagpaluyo sa programa tungod matabangan ang susama nila nga mas nagkinahanglan og tabang gikan sa gobyerno. Kini ang ika 33rd nga payout sa programang AICS sa DSWD ug niabot na sa 18,006 ka Butuanon ang nakabenipisyo niini ilawom sa kadumalahan ni Congressman Aquino II.